我叫張秀琴，外號「阿牛」，來自台中，自細漢佇戲班生活，唱歌仔、唸歌仔，拍武戲、比身段，戲台就是我的世界。為生活四界走闖，二十四歲家己整班（組織戲班），家己開卡車，搭台、搬戲籠。民國七十九年來到臺南三山國王廟演出，臺南人真熱情，噗仔（掌聲）拍袂停，予我決定，就佇台南住落來，落土釘根（落地生根）。

臺南是一個好所在，文化、吃穿攏有講究，臺南嘛是一個有人情味的所在，戲台頂阮大粒汗、細粒汗，戲台跤，鑼鼓袂停，眾人毋願散。賴總統猶是臺南市長的時陣，嘛是按呢，伊共別的政治人物無仝款，看戲看歸齣，毋是搵豆油，做表面功夫，實實在在，予阮鼓勵，予阮希望。

臺南四百年，秀琴歌劇團咧欲（快要）四十年囉，文化傳承，戲曲傳唱，一代一代，風華精彩，希望有一工歌仔戲名聲透海。人講一枝草一點露，無後台，行無跤步。府城古都，客無親疏，歡迎逐家來臺南𨑨迌，來看秀琴歌劇團，鑼鼓響天河。