咱佇定定著愛南北往復的快車路途面頂，不時欣慕台灣的翠青、幼秀佮曠闊，也閣深刻感受著台灣彼个連接過去佮未來的脈跳。台南，就是台灣脈跳的大源頭。

傳統的鬧熱鑼鼓廟聲直直伴奏府城的發展，教堂的祈禱詩歌看顧巿街的變革無煞。新舊文化攏佇遮熱情交陪，成做互相的支持佮安慰，予獨特的台南文化雄壯現身。新嫣的台南美麗做頭，台灣各地方也沓沓搜揣（tshiau-tshuē，探尋）彼个上媠的家己，重新妝娗，自信起行。隨人無仝的在地媠氣，楗出豐沛（phong-phài，豐富）、闊大的台灣主體文化。

對1885年《台灣府城教會報》到1991年的《蕃薯詩刊》，用台語書寫的厚情佮堅持按台南出發，母語的現代文學也是對台南發根（huat-kin，生根）、發穎（puh-ínn，發芽），發花（huat-hue，繁榮）做久長的集體果實，成做上穩在、上奢颺（tshia-iānn，風光）的基底佮見本（kiàn-pún，示範），予台灣文學會得展現自來定著的面貌，行向未來正港多元多樣、多音交響的銅身鐵骨。

台南400年，浮浮沉沉的海鯤鯓美麗反身（píng-sin，翻轉），這隻佇曠闊的大海歡喜跳、自在泅的台灣鯤鯓，也當欲愈明、愈媠、愈光。