台南今年拄好建城四百冬，這四百冬來，無論各行各業，攏培養出袂少傑出、優秀的人才；毋管自古到今，嘛累積濟濟豐富、無仝的文化資產。會使講，台南就是一个生活的好所在、文化的大寶藏。

做一个在地的台南人，我想著真驕傲嘛真榮幸；做一个文化的工作者，我感覺有責任嘛有使命，希望會當為咱的故鄉、為咱的台南，奉獻一份心力，增添一寡光彩。

「王藝明掌中劇團」，有幸佇2009年，登錄文化部文化資產傳統表演藝術保存團體佮台南市定傳統藝術的頭銜。佇這份肯定之下，我一直有一个向望，就是共傳統佮現代結合做伙，利用在地的資料搬演在地的故事，予在地的文化會當定根佇家己的土地。

2010年，我先演出《決戰西拉雅》；2012年，閣再推出《大目降十八嬈傳奇》；猶有，2013年的《決戰焦吧哖》佮2014年的《海島男兒》……等等的作品。毋但強調個人的搬演，我閣重視後代的傳承，我的後生王華東嘛全力支持我的心願，繼續創作佮台南各所在廟會相關的戲齣《藝陣傳奇》，猶有佮府城四大奇案陳守娘故事的《守娘》等作品。除了佇台南各地四界演出，嘛不時出國交流，共台南的文化藝術、在地故事，推捒出去。

最近，有一位日本出名的電影大導演，計畫欲共咱台南一名偉大人物的故事，拍做電影，發行世界。影片內底，專工欲安排布袋戲演出的部分，增加本土文化的特色。

台南建城四百冬，以後猶有五百冬、六百冬……我真心向望佮相信，咱在地的文化佮咱台南的歷史，會一直傳承落去，予咱的代代囝孫。