咱這代躬逢其盛有緣拄著臺南400年，過往親像電影彼一般，原住民、荷蘭人、唐山人、日本人、中國人、臺灣人、新住民，攏曾經佇這塊番薯仔土地留下無仝款的跤跡，有的來去如煙，已經變做歷史，有的落地釘根，佇遮生湠發展。「臺南400年」，咱只有搪著（tn̄g-tio̍h）這擺，咱攏當佇歷史現場繼續咧寫歷史。

時代一直向前，咱只不過是白駒過隙，400冬前「唐山過臺灣，心肝結規丸」的先民，從來袂想著以後會有飛行機、太空船；1960年代蝕月（sit-gue̍h）猶佇咧摃鑼摃鼓摃面桶，哪會知影無偌久阿姆斯壯就登陸月球矣。時代咧進步誠緊，緊甲目睭一下𥍉，紅嬰仔就變做頭毛喙鬚白的老人矣，莫講400年，就是明仔載咱嘛毋知影世界會變做啥款；毋過，對未來咱總是有向望，小者，安身立命，家園宜居，大者，城市有榮光，國家有地位。

做為臺南人，咱攏有一種歷史文化的光榮感，彼是歷代前輩拍落來的江山，咱這代繼續拍拚，對臺南行向世界，予臺灣成做臺灣人的臺灣，予咱看會著世界的媠，嘛予世界看會著臺灣的媠，閣較予後代囝孫攏有身為臺灣人的驕傲。這个向望，親像種樹仔仝款，咱毋知影樹仔會當大偌懸，但是知影以後伊會蔭蔭（ìm-ńg），會當予後代人秋凊（tshiu-tshìn），所以，咱只管認真種樹仔。